Abside Iglesia Moriello de Sampietro

Abside Iglesia Moriello de Sampietro
Abside Iglesia Morillo de Sampietro

jueves, 14 de julio de 2016

NUNCA ASTÍ, SIEMPRE ASTÍ.

As entradas ta iste blog, s´ han disparaú com´un codete con a fiesta de Moriello. Grazias, porque paez que con ixo s´ha disparaú tamién l´intrés por o lugar, y anque o que s´ha perdiú no y torne, fa goyo saper a cantidá de chen que ha treballaú, treballa, y lo quiere. Pa yo, que ta toz os sitios que iba, me feban dezir tres u cuatro bezes o nombre de ande bebiba, me paez como si de momento s´encendese una luminaria que amuestra o lugar, ya espaldaú y desfeito, pero quiesto, siempre como cualcosa de yo, como un tresoro que pocos conozeban y encara  conocen. 
  No pasaba ni un solo dia, que no me pasase por o tozuelo os treserols royos, as luces d´Aspuña alla baixo... a Peña Montañesa en alto... dimpués de l´escamallo que m´eba de dar ta llegar ta casa, pero una bez allí se yera tan  bien... y con tan poca cosa...
 No me podeba puyar ni baixar toz os libros que precisaba pa ir ta a escuela, y os dicionarios se me clababan en as costillas. Tamién as tronadas me feban tremolar y as cazerías a laú de a pista, as sudadas por querer llegar antes de fese de noche... os chabalíns, que te daban un espanto...y una bez que una alica culebrera se tiró a replega-ne una, en una faixa denzima de a mia capeza, y por un inte m´esbarafundió asabelo.
Pero dimpués  me lo pasaba tan bien astí... feba atra bida, que muitas bezes no podeba compartir con naide, pero era solo de yo y aprendeba tantas cosas...Son tantos ricuerdos...Os cuentos de yayo, as forneadas  de mama,  os cudiaus de tía, o que sabeba yaya... Os crabitos os corderos os pollos y as gallinas (en libertá) y tantas y tantas cosas que anque he bibiú siempre en un lugar chicorrón, no he tornaú a bier...
A ulor de fumo de cortar as arnas, o tremoncillo de a Peña, o güena que sabeba l´augua de a fuente a Morera dimpués de traela por ixos caminos, de os guisos en a caserola de fierro, o pan a torta y o pastillo que saliba en ixe forno, os mios geranios y l´albaca, os mixinos y a perreta.
  Siempre me deziban que yo m´en teneba que ir de allí, que no yera sitio ta bebir y prou que fue berdá; a escuela, l´instituto, o treballo... os amigos... todo yera difuera, solo quedaba astí os sentimientos, os recuerdos y con os quiestos güelos un gran piazo de o mio corazón.   


domingo, 26 de junio de 2016

TA MORILLO, SIN PENAR.

A carretera ta Morillo- Moriello Sampietro cuasi ye rematada. Os treballos ban en bueno, y puyemos en media ora, sin estricallar l´auto y sin escruchinanos as costillas.
En casa nuestra, a puerta yera ubierta, y se sentiba ulor de pan. Os pans y as tortas s´enfriaban en a masadría y o forno echaba calor. Sara con a suya amabilidá nos fizo entrar.  Agustín feba fuego ta asar pizcas y por toz os puestos iba y beniba chen, que quereba acompañanos y zelebrar que ¡a la fin se podeba ir ta Morillo como ta un atro puesto! S´eba de apañar os autos, ta poder recular sin armar un zipizascle, Ibón y Mario s´emplegón en ixo. 
 Encara me paizeba que podeba bier a os zagueros bezinos de o lugar que ya no y son con nusatros:  Pilar y María, y os yayos de casa Campo, O yayo de Martín, Tomás, Ascensión y Bitoria de Casa López, Manuel y Pepe de Casa Berná, Bicente, Feliciana y Abelina de Casa Balantín, Grabiel y Rosa de casa Buerba, y tía Julia de Cuello.
Pero yeran con nusatros Rosa y Teresa de casa López,  Conchita de casa Balantín (que chunto con yo semos as zagueras ninonas d´a  escuela). Luis y Severino con a familia.  Luis, Ascensión y familia tamién de casa López. Ombres y mullés de l´Asociación As Gabarderas, amigos, os cazadórs, os que fan a pista... chen de Boltaña, de Buerba, de Ascaso, de San Vicente...
L´auno me charraba de yayo, l´atro de mama, l´atra de cuan yeranos chicorronas... y todo ixo con pan de casa, cervezas de A cabezonada, cordero de a Fueva, vino y cava de no sé ande, crespillos de Piarruego, licor de Santa Liestra, Trenza de Uesca ... pero a torta y o pan de Morillo, de o forno de Campo se llebón  o premio. Ye a primera bez que beigo sacar pan y pizca y a chen se minchaba o pan antes que a pizca.
Primero rondemos con A Ronda de Boltaña, y luego entre trago y trago, tarugos de queso de craba que fa Manel en La Fresneda en Teruel, porróns de vino y cerbeza y dimpués todo ixo que tos deziba antes.

Os ricuerdos, os abrazos, as risas y as glarimas, os bailes, a chinta, os tragos...os amigos... amainón a tristura de casas y paréz espaldadas, y ruinas sin fin, que no s´han puesto apañar, por as penalidáz qu´eba de pasar o que quereba fer bella cosa.
Entre todo ixo, tornemos ta casa rebentaús, pero con o conbenzimiento de que l´imos daú a buelta a l´istoria de o lugar, y que de o que paizeba la fin, imos feito un comenzipio.          

miércoles, 8 de junio de 2016

APAÑO CARRETERA AINSA-ARCUSA ¡YA YE ORA !

  O domingo, dia 5, torné a salir de casa ta pedir que nos apañen a carretera, no, que apañen a carretera, que no ye nuestra, anque pase por as nuestras propiedáz, ye de toz, una nezesidá ta nusatros, ta poder ir ta casa, ta o medico, t´a  escuela... en fin, que ye familiar como o rollano de casa, pero no ye nuestra, ye publica, de o Concello de L´Ainsa. O nuestro dreito ye poder pasar, y a suya obligazión que se pueda pasar.
 O mío fillo me diz qu´imos espachaú media bida pidiendo pistas, apaños de carreteras, augua, luz, telefono, medicos ... tamién diz, que el no piensa fe-lo asina . Que si apañan as cosas, de buena traza, como en atros puestos, pos que treballará aquí y si no se mirará treballo en atro puesto, y prou. Y atra cosa, que le paez  que no bi-ha dreito ni razóns que asistan a perdida de tiempo en espechicar con cosas tan alazetals. Yo le dizié que ye porque semos probes,  y me rispondió que ye porque semos pocos. De tanto senti-lo dan arcadas, pero ye berdá.
 Si, si, toz queremos que as cosas se fayan bien y no se estricalle cosa. Pero, dimpués de toz os bituperios que imos pasaú y pasamos, ta poder mantener os lugárs, que no nos biengan con capazos de "cinismo".
Porque no trobo atra traza de clamar, os escamallos y l´intrés por parar os treballos en  dos bueltas de carretera, de os que s´han feito casas ande que nunca n´eba abiú, espachan a mierda sin depuradoras, fan manecer placas solárs en os caixigárs,  punchan a traída de l´augua en cualquier puesto, u plantan un montón de zolles  a ran de o río y de a carretera. Si, si, bi-ha muitas cosas que puen ser legals, pero no lo paezen, y no se rechiran, porque as chens de ixos lugárs prexinamos que ye millor tener bezinos que no tene-los. Pero alomillor biyendo as cosas que se beyen, y mascando as cosas que nos fan mascar, nos tornamos "legalistas", aprendemos de leis y de chuezes, emos tiempo ta "controlar" os concellos, y a l´aministrazión
y manezemos , a la fin, amos de a nuestra tierra y de os nuestros quefers.






viernes, 5 de junio de 2015

DE O BURO CON BUEÑA TA OS TRASLARVES Y OS NÚCLEOS DE FECUNDACION


En casa nuestra, siempre eba abiú abelletas. Yera un treballo, que cuasi siempre feba yayo: armar arnas, preparar arnas, limpiar arnas... Aún me paez que lo beigo, dimpués de fer una cesta larga con cañas, asentase en una banqueta en o sol y reboza-la con buro y bueña de baca por aentro. No eba de biese cosa de luz, ni un foraú, dimpués en a punta, un piello (piedra picada redonda) que s'apegaba tamién con bueña y cerraba l'arna por una punta, l'atra que s'eba de cerrar dimpués de entrar as abellas, se le deixaba unos foraús (ludidor) picaús en a piedra redonda. En ixa "fortaleza" bebiban as abellas y feban os panals con a cera y a miel que se les podeba sacar con muito fumo, en a sanmigalada.
Yayo deziba que si podese biyer un arna por aentro, feba u daba, o que fuese. Qu'en Franzia eba conoxiú un ombre, con una de cristal, y ascape l'en eban rebozaú de zera y no se bieba cosa.
Cuan saliba un enxambre, y no se paraba, lo enrestíba-nos, fendo rudio con dos pedretas, u tirando zarpaús de tierra. Dimpués replegalas ta un arna limpia, a paladas con una sartén de o mango curto. Ande se bi-eba un rebullón; astí ba a reina, me deziban. Pero nunca en bide garra, siempre a resguardo de toz os mals...
A chen de o lugar, y de atros puestos, replegaba a miel como una merezina, y la cambeaban por atros presentes: patatas, quesos de güella, dineros, u cosas que se estimaban proú, parellanas con a miel.


Dimpués de tiempo qu'en tenébanos pocas, o mío fillo, ha quiesto treballar con as abellas, ha remataú de estudiar y torna ta casa, no ha puesto bier una cosa que l'aiga enlucernaú más que aprender os aministers  ta criar ixos animals que fan tantismo bien, y que pocas bezes se les reconoce. Diz que ye o treballo mas majo de o mundo. Dificil, pero mui majo.
Uey, l'industria fa unas arnas perfeutas, que fazilitan muchismo os treballos, les posan unos marcos con finismas capas de zera, que ellas continan estirando, perfeutas arquitectas y piqueras, treballan contino, y con o que se sape agora, se les fa fer polidezas. En unas arnas chicorronas, con unos cados largos, pone as larvas y les fa fer reinas, se fabrica os enxambres, y tamién fan miel, y robillo (un regalo, un tesoro)
Ye un treballo minucioso, que precisa conozimiento y entrar una miqueta en os ritmos de a naturaleza.
Tamién emos feito dos arnas de cristal, y no nos las han embadurnaú de propoleos como  deziba yayo.
Paco feba fotos cuan yéranos con os treballos, y bi-ha fotos ta bier y no parar: de os enxambres, de o robillo, de a reina naciendo, de as abelletas danzando, de o moscardo...
Comenzipiamos l'añada criando reinas ta fer enxambres y cambear as reinas biellas en as nuestras arnas. Isto nos fa aber siempre reinas chobens en plena produzión.
As reinas las femos criar, selezionando "larvas" (cucos que se fan de a puesta de a reina) de menos de 8 oras, de as nuestras arnas más güenas, y posandolas n'un arna que no tienga reina. A partir de ixe cuco (larva) as abellas s'en farán atra nueba.
O dia 11 nace a reina, y la posamos n´una caixa chiqueta (núcleo de fecundación) con unas poquetas abellas ta alimentala.
A reina fa unos buelos ta aparease os 10 dias dimpués de nazer.
14 dias dimpués, femos a comprobación de que a reina empieza a poner güegos. Ya se puede poner en os enxambres, ta cambear as biellas, u ta bendela. Ye a cría de reinas.



lunes, 13 de abril de 2015

A PISTA MORIELLO S´APAÑARÁ

Paez que a pista Morillo u Moriello de Sampietro se ba a apañar. O dia 6 fizo pleno o conzello de Boltaña y paez que son d´alcuerdo toz, en que s´apañe. Como he daú tanta tabarra con ixo, pos agora que semos esperanzaús, tamién quiero dezilo. Grazias a toz os que me escribibaz con palabras mui majas, que guardo en o corazón. Gracias a toz os que firmez, y grazias por apoyar os que no tos yera cercano, pero lo beyebaz de chustizia. no cantamos vitoria, pero paez que por lo menos se nos fa caso, que algo ye.
Por otra parte son bibiendo dos presonas en Moriello, de contino. Larga bida y muitas ganas de treballar a Sara y Agustín que replegan o testigo de Raúl y de atros que lo replegón de os mios deban- pasaús. No pararemos dica que Moriello torne a ser o lugar polido, apañaú y espitalario que dantes yera.

YO NO SOI A QUE REPLEGA AS BASURAS

En Sobrarbenses han puesto un enrastre t´a falordia de o duende que replega basuras, y s´ ha leiu de punta a punta. Grazias a toz os que me deziz que bien, que tos cuacan os míos escritos, y que tos rediz una miqueta. Pero tiengo que esclarecer, y que quede bien platero,  que a yo me fa goyo escribir, pero no soi a que pone as basuras en as matas. (Un montón de chen me diz que soi yo). No ninos, un atro duende bi-ha por astí, yo foi treballar o tozuelo, pero no tiengo tiempo ni puedo caminar por ixe trozo de carretera.

viernes, 3 de abril de 2015

O DUENDE QUE REPLEGABA BASURA.

 En un trozo de carretera ta ir de L´Ainsa ta Franzia, pasaú o lugar de Lafortunada u L´infortunada, antes de o desfiladero de as Debotas, comenzipié a biyer un fenomeno que m ´alticamaba. Un día una bolsa de plastico en una buxera, una botella de as d´augua en una aliaga... puestas astí bien bisteras. O primer diya me pensé que yera un siñal de os caminadórs, y no fize caso.
 A l´atro diya en bi- eba mas. Una lata de Coca- Cola, una botella de Fanta en un arto, una botella chicorrona en un romero, una lata de refresco, una bolsa de trunfas, una caixeta de cigarros, sacos de moqueros, tamién una alpargata...
Primero no feba caso, pero me dié cuenta de que o duende de As debotas cuasi cada día en feba una de as suyas, y cuasi toz os romeros, as buxeras os chinibros, o xigüerre, os tremonzillos, yeran plenos de ferrincallos, trafallóns y sacos.
Toz os dias me feba o proposito de pasar sin biyer ixo. Me miraba ta Zinca, sentiba o rudio de l´augua cuasi de mayenco. Me miraba t´o lau d´abaixo de a carretera, ta os árbols de o canto, as flórs, os caixigos y os azirons, as badinas, as ralleras. Si cayeba una miqueta nieú, ixe dia no bi-eba si que a carretera y o chelo, pero si se desfeba, ascape surtiba un saco astí, una botella en a punta un tocho, un papel de chicolate, un ferrincallo n´un lastón...
Les ne deziba a toz, naide me feba caso. No lo bieban. No s´aperzibiban u si lo bieban les paizeba normal.
Mientras yo prexinaba o que podeba ser: ¿espantallos ta os paixaricos?, no, no bi-eba güertos con sembraú en a cuneta.
Un dia me dizié que as yerbas: cantaricas, briolas, chicoinas, lastóns y latazins... fartas de que les tapasen o sol, eban desarrollaú un brazo ta colgar as potras en as matas: buxos, coscollos, espigols, chinibros u sabinas.
Atro dia me paizeba que alomillor yera que una chen no lo bi-eba y atra si, como o cuento de o rei que iba desnudo, pero ixo no podeba ser.  Tamién que como ye a coda de o Glaziar de os Treserols, patrimonio de l´umanidá, eba un dreito ta fer manezer una traza de librase de ixos burzs.
 A reyalidá ye, que astí son as potras en a entrada de o Desfiladero de as Devotas, en a enbista de toz, ta que os que las han tiraú astí u en tiran en atro puesto, se les rechiren os bodillos y paren cuenta.

Ninóns y ninonas, busatros que me podez creyer, no tirez cosa ta suelo ni ta as cunetas en Sobrarbe,  y si uno que ba con busatros en un auto, fa zeño de tirar bella cosa ta suelo, no lo deixéz, o duende de as Debotas, lo pondrá n´a punta un arbol y nos castigará a bielo astí por muito tiempo.




lunes, 9 de marzo de 2015

NO SE CUANDO NOS BEREMOS.

Prou tiempo fa que no podeba escribir, no m´en podeba apañar. Bi ha que tener ganas ta fer charradetas, torna-se a trobar con os escritos, fa diyas que foy a fuineta, no me fa goyo tornar a escribir, rechirar en o tozuelo y troba-me con as chens que ya no y son, que s´en han iu que s´ha remataú o tiempo de ser astí, en a mia bida.
 A mia mama, l´alma de a casa de Morillo, a forniga de ixos móns que agora y son una miqueta mas solos. Tamién pue ser o que siempre m´eba  paiziú a yo, que astí biben en ixa redolada os míos debanpasaús y yo no puedo permitir que no tiengan casa ni güerto, ni figueras ni zerulleros, ni nugueras.
 Esfenderé a casa de o mío pai, deziba Grabiel Aresti. Uey yo tamién lo digo. Cuentra a inchustizia, a desiria, a cruda ley de os dineros y os rendimientos, os mandamases compraús, os "defensórs" de as tradizións...
Con as mans, os brazos, todo o cuerpo y  os mas grans deseyos que pueda guardar en o mío peito, faré o que pueda ta esfender a casa de os míos debanpasaús.
No tiengo que dezi-zos adiós porque sez y serez siempre astí en a yerba, en os arbols u encara en a yedra de as ruinas de tot ixo que tiempo y tiempo l´ez dau bida.
Y a puerta ye ubierta ta o que con yo, por fin bienga a fe-zos compañia.

lunes, 24 de noviembre de 2014

A FUÉN - TE O BIÑERO.

Entre Atorrozilla y Santa Maria de Buil, en un pinar que se clama O Biñero Buil se troba ixa fuén, que toz os años s´ escosca de fuellas y lastóns ta pode-nos fer una fiesta con o buenisma que ye ixa augua.
Seguntes os mas biellos, a millor, en buenos trozos, ta beber. Siempre a misma temperatura, y o mismo gusto, siempre o mismo chorro. ¡Qué buena ye!


imagen no mostrada

viernes, 14 de noviembre de 2014

O CALANDARIO.



O mío yayo, me feba mirar o calandario Mariano Castillo, cuasi toz os diyas, y mas que por o tiempo, por as lunas. - Si podas as parras y no ye mingua, no replegarás ni una uva. Ta dale sal a o ganaú que no sea o dia de a buelta luna, pos as güellas se quedan muertas en as salineras. O tiempo tamién cambea, si cambea a luna. En ixe calandario zaragozano beniba o tiempo qu´eba de fer seguntes as fases, pero antiparti de ixo, que l´azertaba porque poneba l´orache que mas u menos soleba fer, frío en l´ibierno, calor en o berano... a balor yera as lunas.- Ninona, mira en o calandario, qué dia chira a luna, que yo no i-beigo...

O calandario de libré royo: fases de luna, fases de o Sol, santos, refrans y mientras tanto; briendas en a cadiera, a laú de o fogaril, tardes de carne de membrillo y nueces con miel. Pastillos de crabaza de radiqué, nueces tostadas en o forno de pan...matacillas en a mingua, ta que no se rebentasen as morcillas, masadas en creciente, subiba más a masa...
Uey he iú ta una tienda en L´Ainsa, y en o mostrador, bi-eba un calandario royo, calendario zaragozano- y en ixe inte, m´he aperzibiú  una bez más que a yo con a infanzia, se m´en han iú tantas cosas... Yo m´en boi a fer un torta en o forno, y brendar en o fogaril, difuera plebe con fuerza, ye; l´agüerro. 

viernes, 7 de noviembre de 2014

AS LUNAS.

M´en boi ta Obarra a beyer a luz de a luna entrando por una lucana.
Agora, paez que penzipiamos a miranos ta a luna.  Replegamos con una miqueta de admirazión y tamién d´enbidia o que deziban os nuestros saputos güelos. Que ta encubar, cortase o pelo, podar, u rechirar cualsiquiera cosa, s´eba de saber si daba buelta a luna. Podar, en a mingua d´Enero u Chinero, matar o tozino en a mingua, cortase o pelo, si querebas que te crecese, en creciente, y si no, en mingua....
Calandario que me retorna ta l´ infanzia, libro ubierto que nusotros inorantes no imos habiú tiempo de fele caso. Toz os diyas, retorna un "iluminaú" con as lunas, dimpués que as chens de istos lugárs se les a quiesto fer  bier como que ixo no yera berdá, que millor cambear ixo por unos "tratamientos" modernos.
Toz os dichos y diziendas de a luna, no resultan, pero lomenos, bale a pena parase un inte y prexinar, rechirar o tozuelo, probar o que se pueda, y transmitilo.
Por goyo, por rispeto y por apego as benas de a nuestra cultura, boi a parame unos diyas a replegar todo o que pueda de os quefers en os cambeos de luna.

martes, 14 de octubre de 2014

A NEZESIDÁ NO YE CONZIETO

Os dos zagueros diyas paez que s´han disparaú as entradas en istos escritos. No tiengo intinzión de charrar más de a carretera d´Arcusa, si ye ixo o que tos paez que boi a fer. A nezesidá no ye un conzieto, y cuento que o Concello de l´Ainsa, faya o que ha de fer y as cosas s´apañen ta toz. Pero ixo si, antes de que se nos caigan as canas que nos han saliú dende que demandamos ixe mas que preciso amilloramiento de a carretera.
Agora ixo si, ya que pasa por Atorrozilla u Latorrecilla (no por medio, si a 200mts) y boi a poner os campos, os árbols, as piedras y a tierra de ixe lugar,  que cuento se rechirarán y cambearán  ta que toz podamos pasar en l´auto.
 


domingo, 17 de agosto de 2014

SALUDO

Saludos ta la colla de charradórs d'aragonés de Barcelona. M´en trobé una de ixos,  en a fiesta de Buil: Milia Juste de casa Escapa. Me dizió que rechiraban por os míos escritos, me fa goyo de sabelo, y a bier si femos bel entrecambeo de charradas y papels.
A birolla en Buil, güena, güena. M'en fué antes d'ora, que si no no balgo ta cosa,
pero como toz os años a zena mannifica y as charradas tamién, o baile animaú,
anque, a yo, me cuacaban proú os mosicos d'antis.
 A primera bez que yo fué ta Buil, fa cuasi trenta añadas, con a madre de Minerva, Conchi Saludas, o lugar yera prou espoblaú, dimpués de fer a pista, y treballar muito, torna a ser o lugar polido y siñorial que siempre eba siú.
Tamién tiengo un escrito de o berano d'antis, que pondré en o blog cualsiquier dia.
Y a os de a colla de charradórs, cuasi cuasi no quiero deziles atra cosa que como a os nabateros: larga bida, y muitas ganas de treballar.



sábado, 2 de agosto de 2014

L´ESPARBERO QUE NO MINCHABA GALLINAS.




As falordias comenzipian con -  UNA BEZ... y dimpués un cuento, una falordia de yayos ta ninóns u ninonas, de animals que charran y sapen como chens, de chens que se comunican con os animals, u de chen que no ascuita, y que no sape.  
N´o  berano de ista añada, me paez que no m´en queda de falordias n´o tozuelo, y cuasi cuasi se m´entrefila que o bebir cutiano ye prou falordia,  pero m´asentaré n´una tranca de tieda y diré :

 Una bez... n´un lugar de Sobrarbe que ha una peña a lau, eba un esparbero que le feban goyo as gallinas, o gallo, os crabitos y os corderos, que yeran por astí por os praús.
- Yo cazo gallinas, pero tiengo que guardame de que no me cazen a yo.
Por ixo, y antes de que m´estricallen,  faré bondá y no mincharé gallinas, ni os animals que cudian os ombres, antimás no me deixaré bier ta que no sospechen de yo. Por ixo bolaba alto, tan alto, que no se podeba saber si yera paixarico u un  punto n´o zielo.

Se fizo o niedo en o forato, y bebiba bien astí, criaba toz os años, pero no minchaba gallinas, s´en iba a cazar tordas, palomos, fardachos y culebras, ta que os cazadórs no lo matasen. En o lugar bebiba poca chen, yeran cazadórs de  chabalins y atros animals si podeban, pero a ixe esparbero, a ixe, no lo tocaban.  Yera como un pauto; no tocalo, no fa dengún  mal, ye l' esparbero d'a Peña.

  Feba años que no se sentiba muitos rudios en o lugar, que no teneba carretera, se puyaba por una pista de piedras con un todo-terreno. Solo bella bez o  bufido de  l´aire y l´augua de un barranco por dentro de os cantals.  A l´esparbero le feba goyo sentise o chilo que feba cuan otilaba- chiiiiiiiiiii- y puyaba alto, muy alto en o zielo.
Os yayos que bebiban astí deziban: Ixe esparbero no toca cosa, deixalo, deixalo que si no fa mal, bel bien fará.

Pero resulta que un diya manezión unos ombres disfrazaús, eba saliú por a televisión que en un lugar, eba un esparbero que no minchaba gallinas y con antiollos dende a Peña, se lo miraban, yera dino d´estudio, se lo quereban llebar, sacale plumas, replegar güegos... feban fotografias, peliculas, le grababan o chilo...
Ixe diya, l´esparbero s´a perzibió de que no bi- eba atra chen en o lugar, ¿an yeran os amos de as gallinas, que dallaban os praús y sacaban a pagentar güellas?¿an yeran os cazadórs de chabalíns? y ¿as mullérs y os ninóns?  En o lugar no quedaba chen, s´en eban iú ta otro lugar, con carretera, augua corriente, luz eletrica y con quien les aduyase a fer as faziendas. Fartos de que dengún les echase una man. Fartos de que se cayesen os tellaús, s´espaldasen as parez,
se barzasen os trocos y no poder mobese por astí.  
 Agora -bi-eba "presupuesto"ixe monte yera espazio protexiú ta fer criar esparberos, que se sabese o que minchaban y porqué.  




miércoles, 23 de julio de 2014

PREXINANDO EN MORIELLO DE SAMPIETRO.

Aentro de o mio peito, esgarrapo y no trobo trazas  de goyo dengún. Un simple pleno en a Villa de Boltaña, m'ha feito surtir demonios d' aentro, una impotenzia y unos sentimientos que siempre han siu asti, amagaús, fendo un poso, que marca en a bida. No puncha, como dantis, pero alticama y enbesca. Y solo pediba-nos... una miserable pista ta poder lebar materials t' apañar as nuestras propiedaz...
Como deziba Gabriel Aresti : -esfenderé  a casa de o mio pai,  me deixarán sin brazos, sin güembros y sin peitos y con l'alma esfenderé a casa de o mío pai.-
Esfenderé o que aiga que esfender, anque me paez que alomillor ye tarde. Tarde ta os debanpasaús que s´abión de morir sin bier ubrir un grifo en casa. Que bidon cayer as parez qu'eban feito con a sudor de a suya frén, que han bisto cayer a paré tamién de o zeminterio. Tarde ta yo, que dimpués de pasame a bida aprendiendo, apañando casas, limpiando camíns, treballando sin parar, me persigue a desiria. Yo cuento que ye una maldizión de clase: luitar y  luitar siempre por cosas que son augua pasada en atros puestos.
Me solidarizo con os probes de o mundo, con os que no son ascuitaús en as suyas nezesidáz y reibindicazións. Me siento insinificante, numero de papeleta y m´en boi d'astí a esfender a casa de o mío pai.


martes, 18 de marzo de 2014

¿IMOS PERDIÚ L'ESMO?

 Dimpués de leyer escritos publicaús estos dias, charrando de o mal que se fan os treballos en a carretera  de L' Ainsa ta Arcusa, me beniba ta o tozuelo una frase:
En pagas, de toz os betuperios que imos pasau y pasamos, encara pedimos cosas razonables.
No cuento que sea muy difizil de biyer, que queramos llegar ta casa sin estalapizanos, sin espantanos cuan nos tropezamos con un camión, sin rematar en a cuneta, u repasar os debanpasaús de toz os de o Conzello de l´Ainsa.
Cuento que dica  os tresplantaús de ziudá, pueden fer un poder y replegar,  que pedir una chiqueta carretera, no ye ser insensible ta os problemas de o medio ambiente, ni nos queremos cargar un lugar, ni un camino romano, ni una fuen, ni cosa.
No ha de pasar l' AVE ni l' autopista de que me sio, ye una carretera ta ir ta casa nuestra, una miqueta millor que agora, que le repasen os foraús  y que cudien o chelo en l' ibierno. Ixa carretera ( pista esfaltada), que ye agora, tamién se fizo con l' escamallo de os bezinos de ixos lugárs, que encara remeran tener que sacase dineros de chintar, ta fer, por exiemplo, o puente d'Ena.
A chen que imos dezidiu bibir en o monte, en os lugaróns chicotes, no por gusto, emos a casa astí. Y bel dia, se nos fan ganas de no arrastrar tantas dificultaz de contino. Todo ye tan difizil, y ba tan despazio...
Berdá ye, que as güeito de o maitin un dia d'ibierno, no me trobo a dengún de ixos que agora les alticama, por ande pasa a carretera. Son en una "urbanizazión" de L' Ainsa, con a calefazión zentral y biyendo Os Treserols, y a torre de Guaso, por a lucana. 
Que siga bien platero que dengún queremos, por lo menos yo no, que se fayan atropellos ni con os lugárs ni con a chen, ni  con os paixaricos, pero semos fartos de as rechiras y escamallos que fan manezer, chen que cuan ha abiú que rascase as pochas, y reñir ta trayer, por exiemplo l'augua, no sapemos an yeran.
¿No se podrá fer cosa ta apañanos una miqueta a bida a os que bibimos por ixos lugars, u qué?

miércoles, 5 de febrero de 2014

MORIELLO DE SAMPIETRO-Morillo de Sampietro.


N´a  enbista de ista foto me iz a pedir  ir t´astí. Y tos tiengo que dezir que a pista ye intransitable y o lugar mui espaldaú.  Paez cuasi imposible, que no se pueda tener apañaú un lugar tan majo en una situazión  increyible:  A un paso de Buerba y de Boltaña, en a misma puerta de o Parque Nazional, en o "corazón" de o  Sobrarbe y de o Pirineo, por emplegar parolas fazils.
Ta astí imos llegaú y no fan falta parolas, a realidá ye bistera y triste.
Imos a rematar con a desiria de muitos años, imos a  pedir una pista ta Moriello, con proyeutos de recuperazión. Encara bi-ha intresaus en ir ta ixe lugar, a pasar unos dias, u encara a bebir temporadas, queremos tene-lo una miqueta escoscaú, por ixo imos mandau escritos ta o Concello de Boltaña y tamién imos a replegar firmas, a bier si se podese ir ta Moriello como ta cualsiquiera atro lugar. A chen, encara emos de pedir como un "favor" os nuestros dreitos.

POR UN ACCESO DIGNO A MORILLO DE SAMPIETRO, QUE EVITE EL ABANDONO DEFINITIVO DE OTRO PUEBLO DEL PIRINEO ARAGONÉS. 

viernes, 10 de enero de 2014

AS CALANDRAS: PREDIZIÓN DE L'ORACHE TA 2014.

Seguntes a predizión de as pasadas calandras, en 2014  ha de fer iste tiempo u orache:


ENERO: A primera mitá sol y una miqueta de  frío por as nueis, dimpués nuble, pleber, y  temperaturas t'alto ta o tiempo que ye.

FEBRERO: En primeras sol y frio, ta a segunda quinzena, nuble y güena temperatura.

MARZO:  Prenzipia con sol y frio y  a segunda metá nuble, pleber,  y a la fin, aire.

ABRIL: En primeras sol y escampe, ta mediaus nuble,  y a segunda quinzena augua y mas augua.

MAYO:  A predizión ta iste mes, ha siu de pleber mayormente. Unos dias nubles en primeras, y a mitá mes, unos dias de sol.

CHUNIO: En primeras sol y güena temperatura, ta mitá mes s'anubla, y dimpués pleber.

CHULIO: Cuasi todo o mes pleber, calma,  nuble, y a la fin unos diyas de sol.

AGOSTO: Sol, y aire, muito aire, algo nuble a metá mes, y  a la fin atra bez sol.

SETIEMBRE: Sol y fresco, sequera, sol y aire.

OTUBRE:  En primeras, sol y frío, a metá mes, s'anublará, a segunda quinzena pleber, y remata con  sol y aire frío.

NOBIEMBRE:  Nuble y pleber, dimpués  boira. A segunda quinzena nuble, y remata con sereno y güena temperatura.

DICIEMBRE:  A primera quinzena pleber, dimpués unos diyas de sol, ta rematar con bentisca, nebar por os altos, chelo de nueis.

Ta rematar; 2014 puede estar una añada cuasi de o montón, si descontamos o de pleber os meses de chunio y  chulio y o sequero de  setiembre, cuento que son as dos piores notizias, ta os que fan criar en o monte a chinta nuestra de cada diya.
L'augua de chulio, por no poder replegar l' ordio y o trigo, y o sequero en setiembre, por no poder fer a sementera. Por o que se bei, paez que ye cuasi cuasi como l' año pasaú que ha siú apaizido.
 Nos aconortaremos con o que deziban os güelos; as calandras siempre, siempre, no son zerteras.







viernes, 6 de diciembre de 2013

PUNCHACUBA

Tres días hay en l'año
que relumbran más que o sol,
matazilla, punchacuba,
y o dia de o conserbón.

Torna t´a Plaza de l' Ainsa a fiesta de punchacubas.
O bino, ha siú preziso en a bida de as chens de Sobrarbe dende
tiempo inmemorial. Ye l' hora de bier resultaús de tanto
treballo, de picar zepas y demas cudiaus que se  precisan ta
 poder punchar a cuba  y sacar a la fin, ixos caldos espirituosos.
 Bino u bin, era l´alazé de as chentas de  treballo. Ta barranquiar,
 picar madera, labrar u segar. Tamién  ta fer poncho en as beiladas, u anís casero.
Toz os quefers son acompañaús por o bino, o refrán lo diz:
- con pan y bin, se fa o camín-.



Punchacubas l´año pasaú

jueves, 28 de noviembre de 2013

O MIXINO QUIERE ENTRAR

Fa frio, ixa ye a berdá, l ´ibierno se nos ha colaú sin saber como, ha borrasquiau, y o mio mixino ye friolero.
A pazenzia de un mixino ye infinita, y no s´en irá ni de diya ni de nuei, dica que sienta ubrir a puerta. Entrará como una bala por medio as garras  y se sentará en una cesta a laú d´o  fogaril. 
Bi-ha muitas falordias u istorias de mixinos, a yo m´en contaban de ninona una, que remero con espezial cariño.
Un gato que se clamaba Zereño, saliba a fer as nezesidáz ta o güerto todo o berano, y a rabosa que iba y beniba chintando ugas y figas, le dizió: - En l´ibierno, cuan no tienga figas y zerollas, te me chintaré a tú.
O mixino no replicó cosa. 
Un diya en o preto ibierno, con o rebozo de nieú y chelo, a rabosa bido a  Zereño en una lucana tomando o sol, y rabiando le espetó.-¡ Zereño, te bas a rebentar, que no sales ta o güerto!
- ¡No te fará o morro clo, agora, ya me cago en a tizonera!

   

martes, 26 de noviembre de 2013

L' AGUERRO S' ACARRAZA EN A PUERTA.

Un amigo me deziba l' atro diya que paez que solo sé  charrar de l' orache.  No ye berdá, charro de o que me paez, anque si quiero, que se pueda bier l´esbulligar de una presona que ha bibiú y bibe en contauto con a naturaleza, en Sobrarbe. De l´actualidá bi-ha atros blogs, a  radio y os diarios...os mios escritos son un escamallo ta  poder charrar en a mía fabla,  cosirala,  no alzala  en o fondo de l´arca, con ferrincallos y trafallóns, sacala ta as  "marabillas" de interné, u joreala, difuera de perfeuzións u de teunizismos.
Son as trazas de charrar que tiengo astí aentro, dimpués de toz os betuperios que nos han feito pasar. A fabla y  yo, semos astí, ixo ya ye prou.
Tamién bi-ha blogs amigos que charran de o tiempo u orache, y lo fan mui bien. Yo charraré de os paisaches de as fainas, de as chens, de l'orache,  pero de o que siempre charraré  ye de o que me surta de l' alma.

  Y ta regalo una imachen de l' ag"uerro que s´en ba, y s'acapiza en a puerta.


viernes, 22 de noviembre de 2013

O BERANILLO S. MARTIN TRES DIYAS Y ... FIN.

Remató o beranillo S.  Martin y como era de contar, no y torna.  A nieu nos besita por os altos  y as aireras no deixan tenese  tieso. En as noticias no paran de dezir que nieba y que nieba,  pero toz os sobrarbenses saben que ye aire de puerto y borrasquiar, que ixo no nos deixa blancos en as bals, en os puertos y lugárs como en Chistau en Bielsa y por o laú de Francia, si que son rebozaús.
Güen tiempo ta rematar sementeras, pos diz o dicho que a fin de nobiembre,  o que no ha sembrau,  que  no siembre. Os caixigos son royos aguardando l' ibierno. De chicorrona yera ta yo un misterio que as fuellas de caixigo no se cayesen, dimpu'es me dizi'on qu se cayen en a primabera cuan salen as nuebas.
Os caixigos, os fraixins, os laitoneros, as nugueras  y zerolleras... col'ors y mas colors de caras ta l' ibierno...
os primeros fríos os que mas se sienten.

jueves, 31 de octubre de 2013

ADIOS RIOS, ADIOS FONTES...

S' arrima o dia de as almas u almetas, as crabazas iluminadas, y as besitas a os defuntos con flors y belas.
 N' una lapida de o zeminterio en Torrozilla diz ;  Qué  facil  fue quererte. Imposible, olvidarte.
A emoción m´ha nublau os güellos, como si  ixa presona quiesta, estase encara con nusatros.
 Y beniba prexinando o poema de Rosalía de Castro
en ixa fabla tan apaizida que ye o gallego.

Adiós ríos, adiós fontes,
adiós regatos pequenos
adiós vista de os meus ollos 
no sei cando nos veremos.
Miña terra, miña terra, 
terra donde me eu criéi, 
ortiña que quero tanto,
figueriñas que prantei.
Prados, ríos, arboredas,
pinares que move o vento,
paxariños piadores,
casiña de o meu contento,
muiño de os castañares,
noites craras de luar,
campaniñas timbradoras
de a iglesiña do lugar.
Amorinos das silveiras
que eu le daba o meu amor,
camininos entre o millo
adios, para siempre adios!.




  

miércoles, 23 de octubre de 2013

PLEBEBA

Pleber, fer rayadas fuertes de sol, cayer fuellas de os arbols, paez que ye l´agüerro. Os diyas más curtos y as nueis más largas. Ye o tiempo de replegar as nueces, fer leña, replegar frongos, bellotas y glans. Tamién o tiempo de fer fotos con as colórs royas y amarillencas,  ye sanmigalada as primeras nieus en os Treserols.
Que asperando l´oro blanco,  no se nos ne pase sin apercazanos, ista sanmigalada cuasi calurosa. M´ en boi a replegar fongos y lulos de arto, lulos de gabardera y fuellas de tremos. M´en boi ta Ordesa. Tamién por debaixo de casa, y ta un lugar de cerca . Ta tornar con a capeza y a maquina plena de ixo; de l´agüerro.


 

domingo, 22 de septiembre de 2013

O " PILLAJE" DE AS ABELLETAS

 Me deciban  l'atro dia, os arnaleros, que,  as abelletas en epocas de fambre y si no bi-ha robillo en as flórs, entran  ta as arnas con menos abellas,  y se les pillan a miel. O que quiere decir mas u menos, que os ricos en epocas fambre,  besitan sin parar cuenta, o reposte de os probes.
 Paez que os mandamases de o gubierno de España, ixos que diz imos elexíu entre toz,  son chupando de os treballadórs y de os mas febles, dica deixanos arguellaús.
Nusatros a morir a tocho seco,  y atros trachinando sobres. Y encara no ye prou, por o que se bei. No esclatan de fartos,no.
Paez que a unas chens nos a tocaú ser arnas probes. Solo se me apaña decir que encara emos fizón, y mientras alentemos, emos de luitar ta no deixanos fer o que se nos fa.

martes, 17 de septiembre de 2013

CORREUS Y CORREUAS

Me fa goyo charrar de carteros,  u de correus que asinas les deziban a os ombres que iban con as cartas por os lugárs. Prou t´ atrás son os años en que ixe presonache yera aguardaú toz os dias, encara con nieú, mal orache u bulturnos. O correu ha siú ocheto literario y cinematografico como presonache que podeba desarrollar sensibilidá y romanticismo - el cartero de Neruda -, que trayeba as noticias y que chuniba grupos aislaús.
Ixos tiempos son istoria, semos fartos de noticias, de saper de todo con tocar con o dedo en un cristalé. Fundius en a locura de a comunicación ye bistero  que dengún aguarda cartas de amor,  notizias de un familiar en l´hospital, u de o nacimiento de un ninón. Toz sapemos todo en l´inte que pasa, con luz y taquigrafos.
 Encara semos y bebimos  en Uesca, una provincia en a que cuasi doscientos correus y correuas rurals,  fan plegar a correspondencia ta a puerta casa, de una montonera de lugárs chicorróns qu´ emos por astí. Ixos treballadórs y treballaderas redolan  toz os diyas más de bente mil  Kilometros, puyan ta altos con nieú, con chelo, con cantals y tronadas, como si les ise a bida en ixo, porque ye o suyo treballo.
No caigamos en a fateza de que "agora no se escribe" u de que " fa quince años que no he escrito cartas"
emos de apercibi-nos que ye un serbicio,  no solo ta cartas. En os tiempos de as compras por Internet, as unicas trazas de replegar cosas de tol mundo. Que prexinemos toz,  o que podeba costar un paquete de China, un certificau con acuse de recibo, etc. si no esenos serbicios postals.
Os correus y as correuas conocen a tierra y a chen como nadie, fan un treballo de comunicación, y que no se puede comparar con o de  una ziudá. En os lugárs, cosa se puede comparar con as ziudáz, siempre salimos perdiendo.


lunes, 1 de julio de 2013

YERBA LOCA




Flórs y mas flórs :
tamién en a cuneta, en a cuneta de una pista, me trobé a yerba loca. (Beleño)
una yerba ta curar o mal de muelas. Se feba bullir agua en un puchero y se poneban as flórs secas.
Tal como esplotaban, iban cayendo os " cucos" de as muelas, ta o puchero,  y se pasaba o dolor, tamién baixaba l ´inchazón.



sábado, 29 de junio de 2013

Más flórs de cuneta

                                         

Gorrotillas en a cuneta. Gorrotillas ta alegranos de bi- yelas, ta minchar un animal...
ta besitalas as abellas...

Gorrotillas de cuneta.

viernes, 14 de junio de 2013

Flórs de cuneta

 Yera ta yo una fiesta mira-me as flórs de as cunetas. Toz os dias tiengo que puyar ta Plan y ta Bielsa. En a cuneta se troba una muestra de a flora de ixos paraches; o congosto de as debotas, a ribera de o Zinqueta, a Zinca fendo güega de o Parque Nacional de Ordesa y Monte Perdido -Patrimonio de l´Umanidá-.
Paez qu´en a prou poca de umanidá, con as yerbas de as cunetas.
Una bez, un guardia le echaba una bronca a una muller, que eba cortaú camomila, y me paez bien, pero... os güellos se m´en saliban de o tozuelo l´atro diya cuan bi-e-ba as cunetas abrasadas, sin yerba, sin flórs, secas. ¡ con herbicida!
No quiero fer a ploramica, ni entrar a chafar a maquina mata- yerbas quiero sacar toz os dias, y boi a fe-lo, una foto de una flor de cuneta. A bida no i- tornará  ta ixas, pero ... si alomillor belún se aperzibe de ixe atropello, nos entra una miqueta de sentíu común y podemos tornar  a fer fotos de flórs en as cunetas de  a carretera A-138 de Balbastro ta Francia por Bielsa.



lunes, 10 de junio de 2013

SIN NOMBRE.

A nuestra fabla - l´aragonés - agora le sacan o nombre. O que no ha nombre no y ye. Ixa paez ser a madre de o cordero ¿ta qué? ¿qué les importa a os mal clamaus conselleros de "cultura"  una cultura milenaria? ¿unas trazas de charrar refirmadas en fa mil añadas? ¿que importamos nusatros? os sufrius aldeanos que siempre hemos estorbaú que no imos contaú ta cosa, no sumamos montón, semos "cuatro" y salbachinos.
Una chenerazión que debán de os nuestros güellos ha bisto tirale paladas de bardo a nuestra cultura. Que a os seis  años nos enzerrón en Escuelas Hogar ta cibilizanos. Siempre o que nusatros hemos sabiú no ha baliú ta cosa, as nuestras casas no baleban, as trazas de fer as cosas yeran rancias, a fabla fiera. Siempre hemos siu os proscritos. Tamién ha abiú chen aguda en a nuestra chenerazión, pero os que nos hemos quedaú a bebir y treballar astí, sin fer a pilota, por os nuestros medios, con l ´erencio espiazau y sin bateagüas familiar, nos han escruchinaú contino.
Uey soy farta, ye como si toz os disprezios y os chapazos de chicorrona y de gran,  me caesen dencima de un montón. Me pasan como una pelicula os desplantes en os treballos, os madrugóns y as corridas de dos oras ta l´autobús de o colegio, as tardes de domingo plorando, sin poder estudiar por no tener luz en casa...
A marchinazión y  a inchustizia de as qu´eba  pasau prou poca pena dica agora,  uey son zaborros y barderas en o camín. Y no tiengo fuerzas. Me siento biella y me paez  que ya he bisto proú cosas. No torno a plorar,  os güellos tiengo secos y no boi a dale a dengún o gusto de biyeme plorar de impotenzia.
 As casas,  os campos, as bordas, as masadas, uey no balen cosa, maitin balen muito, y otra  bez tornan a no baler, ye o capitalismo: l´intrés de os poderosos, os barruntos de o mercaú  pero os que de berdá no balemos cosa, ni somos cosa, ni con iste,  ni con dengún gubierno; semos os probes, os que han  de gana-se o pan, con a sudor de a frente. A ixos nos pasa como a nuestra fabla, no emos ni nombre. 

viernes, 7 de junio de 2013

O CUARENTA DE MAYO...

Cuasi semos en o cuarenta de mayo, y l´orache no s´apaña. Por as puntas borrasquea, se nos chelan os tomateros, os pimenteros... todo o güerto escruchinau  y as aireras que fa, no deixan estar por difuera. Puede que sea berdá o de os nuebe meses d´ibierno. No salen os muxardóns ni as muxardinas y o tiempo nos quiere acotolar.
No sé si ye o tiempo, u a situazión cheneral de medrana o que nos torna de unas trazas que paez que se remata o mundo.
Cerca de o cuarenta de mayo, uey nos sacamos o sayo, pero si torna a pleber tornatelo a poner.
L´orache no ye de os dias en os que semos, pero como cuasi siempre, en as altarias de o Pirineo
as primaberas tardan, y paezen ibiernos. Cosa que comparar con as de a tierra plana. As tronadas son o pan de toz os diyas. Granizó en a bal de l´Ara de Fiscal t´alto...
No quiero sacale o quefer a o mio colega y amigo de A Mata  con o suyo blog de meteosobrarbe,  pero que faremos si no charramos de l´orache, que si no apedrega, a yo me cuaca fresco,  as calors me acotolan más.
A chen clama por os güertos que si agora no tiran, dimpués se aflaman con o sol fuerte, y si no fa calor no ganan as plantas. De todas trazas a yo a calor no me fa goyo, no la trobo mica falta.

jueves, 9 de mayo de 2013

A LAPAPYP

No sabeba que escribiba en LAPAPYP .Uey as Cortes d´Aragón, por lei, claman a l´aragonés LAPAPYP y a o catalán d´Aragón  LAPAO.
 Os politicos no se si son capinos u ye que han decidiú redise de toz nusatros. A siñora consellera de a "cultura" de Aragón no l´han marchinaú por charrar basto, u l´han espachaú porque o que charraba paizeba catalán. Os nuestros politicos no han siu marchinaús por cosa, son de güena casa, y o suyo problema paez que ye tener o culo preto en o sillón y empochacar y apercazar todo o que se pueda. Nusatros, semos chens sin atro intrés que saper echar un papelé cada cuatro años en una arqueta. Con ixe papel les damos o poder no solo ta fer o que les cuaca, tamién por o que se bei, ta redise-nos, moflase-nos deixando beyer ampliamén l´inoranzia.
¿No baleba con fer leis que no se cumplen? ¿No baleba con que no abese boluntá de apañar os problemas, deixar morir de inanizión una fabla - una cultura- de zientos d´ añadas? 
O nombre ye o que fa bistero o disprezio mas gran, a incomprensión de plano, ta una fabla que con dificultaz pero eba perbibiu a muitas  imposizións, no podrá fe-lo a istos "gobiernos autonomicos".
A perbibenzia de una fabla ye emplegala: charrar y escribir, comunicase, y yo quiero felo en aragonés, siempre n´aragonés, n´ aragonés siempre, CHARRAME N´ARAGONES.

martes, 7 de mayo de 2013

PONER BISTERA A BASURA.

Fa días que en o laú de a carretera de l´Infortunada ta o congosto de As Devotas, se puede beyer un feito
refitolero y que fa prexinar. En a punta de as rametas de buxo, romero, chinibros u caixigos han iu posando toda a basura que se troba en a cuneta: Talegas de  plastico, latas de refresco, botellas, y hasta un pirulo de marcar obras. Ye o mirallo de a desiria y de o desintrés de muitos condutórs que o monte les paez una femera.
Bien por ixe caminador u ixa caminadera que nos fa beyer en poco trozo, que no emos mica de  cudiau, y que si semos capaces de fer ixo astí, lo faremos en un atro puesto, y asina no se mantienen as cosas.
A dentrada ta o Parque Nacional, o congosto que fizo o Glaciar de Os Treserols no se merece una cuneta plena de as miserias de bafurosos, que chitan pingos t´ as cunetas.
Uey he puesto biyer o mesmo cerca de Plan, paez que atro caminador ha feito o mesmo yo tamién lo faré
imos a limpiar as carreteras.

miércoles, 17 de abril de 2013

D´ABELLETAS

Ye o mes de as abelletas. Deziban os güelos que os xambres " de abril pa mí, os de mayo pa mi hermano, y os de chunio pa ninguno". Con a calor, a reina pone mas güegos, bi-ha mas abellas en l´arna, y s´en han de ir  ta otra casa. Os arnaleros, los replegan u los fan replegase ta un´ arna escoscada y que faya güena ulor a zera u a miel.  A entrada de una boira de abellas ta un arna, ye una bisión que no s´en ba fazil de o tozuelo.
En este tiempo replegan romero, dimpués tremonzillo y así farán  ixe producto ta chupase os dedos, que se clama miel. As faenas de l´arnal, me portea ta l´infanzia : o fumo, a ulor a tremonzillo y espigol, buxo, gabardera... a güeña quemada...o rudio que brama como una tronada de una banda de abelletas, y os estrapaluzios que se podeba llegar a fer ta que se posasen: tocar dos pedretas, tirales tierra... a la fin feban o que quereban. Bueno o que les ditaba o suyo instinto de siglos. Treballo y organizazión son os alazéds de a superbibenzia. D´a superbibenzia de as abelletas depende a nuestra, no solo fan miel, polinizan y con ixo perbibe a esistenzia de as plantas y con ixo de l´oxigeno que plena os libianos.

martes, 9 de abril de 2013

OBRAS CARRETERA ARCUSA -AINSA

¡Ya yera ora!  As obras de a carretera que pasa por o nuestro lugar, paez que s´arriman, anque por esta bez se quedan antes, en o puente d´Ena. Ye un terreno encara mal comunicaú, antiparti de ser o Biello y Alto Sobrarbe. Y de ser a entrada mas emplegada por o turismo ta ir ta o Parque Natural de a Sierra de Guara.
Os lugárs de Guaso, A Torrozilla, Os Rials, Castellazo u Arcusa, en a carretera. Paules de Sasa, Sasa de Surta, As Bellostas, más t´arriba...
Cuasi toz os dueños- de as tierras- han deixaú permiso ta pasar. Con ixo  no s´atrasan as obras más, pero paez que una empresa  no ha feito o que s´eba de fer, con os arbols que son encara de os dueños, pos han daú permiso ta pasar, no ta sacar leña ni pinos ta papel. Con ixo y con todo, as obras se fan, y paez que imos a tener por fin, carretera.
No en ista,  pero en atra begada... alomillor se remata, y podemos ir y benir ta casa como si isemos ta l   L ´Ainsa  ta Boltaña u ta cualsiquiera atro puesto. Aspero que no s´en bayan tamién os esparberos, as boletas ni sisquiera a rabosa. Y que no deixen, como puedo biyer dende a cozina, de parar autos en a "patialla" ta quedase una "postal" de Torrozilla.


martes, 2 de abril de 2013

As cantaricas

Esta tarde beniba de paseame y eba replegaú un ramo de romero. Una bezina me diz: ¡ como te gustan las flores Luisa!. Si que me fan goyo as flórs si, as plantas, os árbols...
Ye Semana Santa y o tozuelo se m´en ha iu ta una flór que saliba en o mío lugar ta ixos diyas mas u menos: as cantaricas(narciso silvestre). Chicotas, amarilletas, con a capeza t´abaixo... y  a suya ulor carauteristica.Con un ramichón se perfumaba  toda a casa. A yo me paizeba prou maja y quereba replega-ne siempre. Ta yo a Semana Santa sape a crespillos y  güele a briolas, buxo y cantaricas.

martes, 26 de marzo de 2013

SI MARZO NO MARZEA...

Si Marzo no marzea, ta abril u  mayo queda. Si marzo no marzea, abril acantalea.
 Se despide o mes de marzo que ha marziau to o que ha quiesto. Semana Santa,  semana l´aire dizen os biellos. Pero a güen tiempo ye clamando en a puerta, ya y son as falzillas en os niedos... floreze o buxo y as zerulleras, presegueras,  manzaneras y muitos árbols más. As almendreras ya no han flórs, y cuento que s´eban chelaú.
Ixe  ye o tiempo que nos toca. As calandras no han siú mui zerteras. Plebe como si no l´ese feito nunca, y diz que torna nieús, tronadas y aire, muito aire. No s´y bei primabera. Comenzipia a beyese bella briola, y paez que pasan grullas, pero o puerto ye d´ibierno y no ha pintas de cambear.
Siempre pasa a misma  cuando paez que biene o berano se retecula, ta l´ibierno mas preto, y cansa no poder fer cosa por difuera. Cuento que dimpués de os "diyas santos" faya bondá o tiempo y podamos salir bella miqueta de cazuela...
En a punta de l´arco iris u arco S.Chuán bi-ha un tesoro, ta o que lo trobe.


martes, 19 de febrero de 2013

¿ QUE TE PAEZ APRENDER ARAGONÉS?
Ite-ne de fin de semana a quedate en una casa de turismo rural y aprender  una miqueta de fabla aragonesa.
Si charrar asina no te paez basto ni fiero, si y beis en ixas trazas de charrar una traza d´expresión de a nuestra cultura y a de os debanpasaús, ¿ qué te paez ir ta Casa Lanau de Torrozilla?. 
No ye solo aprender, ye arrimar o güembro ta un proyeuto que se me fa largo. Dimpués de apañar a casa y a escuela d´as abelletas fer charradas de aragonés. Realmente, l´intresa a belún? bi- ha chen en bel puesto que le faya goyo. Alomillor beis una casa como as de antes, unas arnas como as de antes, y unos paisaches como os de antes, con chen de agora, que ha  nezesidá de asegurase a superbibenzia.


jueves, 7 de febrero de 2013

BIENBENITOS TAL CARNABAL DE LA BAL DE BIELSA

Bienbenitos... ixo diz o cartelón que toz os años se puez leyer en  a entrada de Bielsa, son unos diyas ta fer carnabal. Carnabal ye disbrazase, fer muecas, chintar, y beber. Tamién fer salir l´amontato, o caballé, as trangas y as madamas, os de yedra, as garretas, os onsos y os domadórs... Ye l´estruendo de as esquillas, os estacazos de as baras y as cadenas de os onsos y os "leñazos" que les arrean en os grans sacos de rebasto que los reboza y los fa caminar con as cuatro patas. Tot  ixo y muito más,  ye o carnabal de Bielsa. Estiaño con o lugar rebozaú de nieú, y tamién Parzán, Chisagués, Espierba, Ixabierre...son bien rebozaús. Dizen os biellos que dantis yera así, con muita nieu, con chelo y bulturnos, por ixo se feba o rudio ta espantar l´ibierno y fer benir ascape a Primabera.
Carnabal...carnabal, carnabal te quiero... ye a ronda, cada tranga replega a una madama fendo una estampa de bella y bestia de una culor y contraste cuasi perfeutos. Puez pasar de todo, s´en ba a nieú y o chelo Cornelio Zorrilla ye colgaú, y debaixo, en a plaza de o lugar;  se baila, se canta y  se bebe poncho, se come torta y longaniza en espera de crema-lo a la fin,  por todas as maldáz que ha feito, que estiaño son muitas y malas, mui malas segúntes o chuizio sumarismo que se le fará esta nuei de chuebes.

jueves, 24 de enero de 2013

A PREDIZION DE L´ORACHE TA 2013

Prou tarde se me fa  ta publicar a predizión de 
lórache. Ye que no m´eba puesto apañar. As zelebrazións de os santos barbudos, os nebazos, y demas obligazións me feban no reblar, pero cuasi cuasi.
Diyas de fogueras, refráns, y muita cheminera y quemadillo de ron u malacatón con bino, tortetas y morzillas que biaxean de casa en casa, longanizas y pruebas de l´adobo. Frío, chelo y nieú.
 Se deziba en o mío lugar:
si aquí nieba,¡que será en Yeba! si en Yeba n´hay un palmo, ¡qué sera en Fanlo!. Muitos diyas remero ixe refrán  cuan beigo todo o puerto blanco, y tiengo que puyar ta Plan u  ta Bielsa.
As estampas que puedo biyer no me deixan acordame de peligros, anque mas de una bez 
l´auto paezca que ye birolo...Ye l´ibierno...ya deziban ta santa Aguedeta dica la bragueta
(de nieu s´entiende), y ta S. Blas, un palmo más.  


O mes de Chinero eba de fer sol, pleber y nebar. (Paez que ye berdá.)
Febrero : A primeros pleber, y dimpués sereno.
Marzo : Sol y nuble, sin pleber.
Abril:  En primeras sol y frío, dimpués pleber.
Mayo : Sereno, sol, güen orache y en zagueras aire, muito aire.
Chunio: En primeras nuble, una miqueta de pleber, en zagueras, escampe y nuble por o puerto.
Chulio:  Nuble, sol, pleber una miqueta, fresco.
Agosto:  Nuble, y no muito calor,  algo de pleber y a la fin sol.
Setiembre : Sol y bella miqueta de pleber.
Otubre : Sol y nuble. Güena temperatura.
Nobiembre : Soleaú, cheladas, no pleber y boira t´abaixo. 
Diziembre : Cheladas y sol, no plebe.


  


martes, 27 de noviembre de 2012

D´AGÜERRO

As fuellas secas, a mesa de chintar sola, as boiras a punto de pleber, estampa de agüerro, detrás de casa.
Paez que una miqueta de frior, s´apodera de l´esquinazo.
Se asoma a nieú ta os Treserols,A Peña Montañesa y Cotiella. L´ibierno clama en a puerta. Pero as colórs de os arbols entre a berdor de os praús y o blanco de as puntas, fa una postal que no me canso de mirar, y que tiengo bien grabada en o tozuelo. Por si bel diya no puedo beyer-la...

lunes, 5 de noviembre de 2012

OS ZAPOS Y OS NINÓNS.




Un zapo siempre ha síu  bella cosa atrautiba ta un ninón u ta una ninona. Yo de chicorrona  me pasaba ratos y ratos mirando zapos, y si en trobaba los seguiba; me los miraba fito a fito, con ixe caminar chompo, os güellos que se l´en salen de a capeza, as garras palmeadas... No yera mui bien bisto por a chen gran que a una ninona le fesen tanto goyo os zapos. Son animals maldaús como as culebras, y no se podeban tocar. Nunca en he tocaú dengún, antiparti de abe-me pasau muitas oras espiando-ne.  Por ixo, a mia sorpresa fué cuan un ninón en a calle de a Torrozilla, beniba con un zapo debaixo de o brazo como si carriase un muñeco de trapo. Ixe ninón no ye adotrinaú por as creyenzias d´antis.  No sape que escupen bereno, ni que fan salir granos, ye un animal como cualsiquier atro, dinno de bebir zerca de nusatros, que se come inseutos de o güerto y que no nos fa dengún mal.
Dantes solo saliban en o berano y poco. Ye cuasi un acontecimiento que sean por astí ta Todos Santos, y una fiesta, biyer as caras de satisfauzión de os ninóns.

lunes, 15 de octubre de 2012

PAROLERÍA Y REYALIDÁ


Parolas, parolas buedas, no se puede ubrir a radio, ni a telebisión ni cosa sin sentir ixo.
Dineros, dineros, dineros y cosa más. A soziedá de o "bien estar" s´ha tornaú a soziedá de o "mal estar" 
Toz enfurruñaús porque no sapen como empochacar mas que o bezino, saper más que o bezino, punchar, fer burz, escruchinar... agora mas que nunca ye l´ora de caminar chuntos, d´aduyanos. Mandar a escampar a boira a toz os caparras y surtir  a chen de bien, amostrar o que podemos fer dixas trazas.
Y en ixa barafundia, a reyalidá mia, a de o lugar ande nazié.
Bueno;  quereba dezir que o sabado puyé ta o mío lugar. Y dimpués de trobanos zincozientos cazadórs que paizeba yeran surtius de una pelicula de "Rambo" y en medio de a mala gana que da biyer cuasi todo espaldau, o grandismo goyo  de trobanos unos chobens, treballando, fendo una paré y limpiando maderos cresaús. Os que han propiedaz las son apañando u aguardando apañalas. Ye mui difizil apañar, pero solo se m´ocurre dezir, que fa más o que quiere, que o que puede. Y si entre toz no s´amorta  de todo o lugar, ye un goyo mui gran.
Dimpués que ya no se caye casa Campo... dimpués d´aplanase casa Roquero, casa Berná y casa Cuello...
¡Se fará o que se pueda!. o que se pueda... que ye poco. Pero en a situazión de ixe lugar, o poco ye mucho.
Amás deziban de que a ferraría no se podeba cayer... que ye a zaguera de todo o Pirineo. Bel estalentaú ha feito desaparezer o mallo y bels trastes pero y son encara  o manchón, o fogaril, y o yunque (no sé como se clama n´aragonés).
Muitas ganas de treballar a ixos chobens, y no tan chobens, que no desaparezca de o mapa Moriello, u Morillo de Sampietro, anque o conzello de Boltaña quiera fenos puyar toda a bida por un camino infernal, rebentemos un auto cada bez, u paguemos os materials a prezio salmón...


miércoles, 26 de septiembre de 2012

Ta casa nuestra

O berano qu´ eba de ser o que nos aduya a lebantar a capeza,  ( tó paez que ye presto ta ixo) s´en a pasaú como una bolada d´aire. Feba calor, no plebeba y o Biello Sobrarbe no paizeba ixo de una "Comarca del Pirineo". A chen comenzipia a dezir que si bi- ha aire acondizionaú en a  casa y por astí...
Que semos toz  capinos ¿u qué?.
Rebobino n´a mia capeza y torno t´atrás en o tiempo trenta añadas: Cuan en A Torrozilla no bi-eba augua en as casas, toz os lugars yeran a punto d´ise- ne ta ziudáz u ta lugars mas grans. No bi- eba telefono por pocos bezinos... en fin, as mil penurias...
Bel-úns dezidiemos cambear ixo, imos apañaú as casas, os güertos, imos escoscaú os lugárs, sacando os dineros de os bancos, con unos intreses grandismos, echando oras, comprando materials a prezios de salmón...
Bidemos en o turismo una traza de poder pagar a nuestra casa, ixa, que os nuestros pais eban deixau por imposible, y nusatros paez qu´ ebanos de deixar cayer.
Una chen que le cuaca  a naturaleza, en cuenta de ir ta atro puesto de bacazións s´en beniba ta as nuestras casas, y antiparti de disfrutar de o paisache, nos aduya a pagar a hipoteca.
¿Qué dechenerazión de os sentimientos, ha feito esclatar isto?.
As leis de o mercaú l´estabornan todo. A fiebre de a construzión, toda a chen  ha una casa, u dos, u tres, u más... Os pastórs, os comerziantes, os baqueros, os zapateros, os albañils... han lomenos una casa de Turismo Rural. Una casa, un palazio, un montón de apartamentos, un montón de casetas...
Toz semos saputos, enteraús, ricos...
No reconozco o país de "miserias" en o que me he criaú. No tiengo dineros, no soi nueba rica, no tiengo cosa que demostrar, pero tiengo presente siempre a bida de pribazións de "austeridá" que dizen agora, que m´a tocaú bebir.
¡Nusatros si que sapemos o que ye austeridá! y no os que se plenan a boca con ixo.
 Ye prou difizil trobar un cliente, pero al entrar en casa, cuasi hemos de pone-nos a tremolar.
 Semos contimparaús con atros, si abrimos a bentana entran moscas, no corre aire, si fa frío nunca calentamos proú, si fa calor, ye increible.... queremos beyer animals pero puden...
Ye a inspezión permanente, l´alufre sin sentiú, as ganas de rechirar ¿o qué?, ¿qué rechiramos?
¿Sentinos  grans? 
Casa Lanau no ye un Palazio, ni una casa " de ricos" ye a casa de una chen que antiparti de apañala ta nusatros, ye ubierta ta os que que quieran benir a beyenos, y aduyanos a mantene-la. Sez conbidaús ta Casa Nuestra.




viernes, 17 de agosto de 2012

As moscas, no son abellas.

"Inevitables golosas
que ni labraís como abejas,
ni brillaís cual mariposas;
pequeñitas, revoltosas,
vosotras, amigas viejas,
me evocaís todas las cosas."

No me he puesto  resistir a poner ixe trozo de poema de A. Machado. No en conozco un atro n´aragonés
que se paezca.
  Uey quiero charrar de as moscas.
Sí que ye berdá que moscas en bi- ha en toz os puestos ( naturals. ixo si) y a berdá que se diz d´eras patoleras de cosas: cansadas, catenazos, murgas,  ferretes, puercas...
 Os finos que ban ta o monte,  cuasi han de fe-lo con un bote de inseutizida bien preto en o culo.
 Os camins ta alticamase un desustanziau de ziudá en o monte salbachino, son ...desinfinitos. As bacas cagan, as güellas cagan, as piedras son duras, os arbols tiran as fuellas, as aliagas punchan, y as moscas dan murga.
Pero son astí, y a naturaleza que antiparti de saputa, ye empreñadera, fa que s´en crie más y más. No cuento,que sea ta que os estandartes de l´interné, os animals de ziudá, le faya mal prebo en o Monte Perdido (patrimonuio de l´ umanidá) si les acude una mosca ta o bocadillo,  ta os morros( prou finos), u ta a bragueta. Ni ta que bafurosos barriobaixeros se sientan ofendius cuan por a finestra d´una casa rural, entre... una mosca, u mosquito ... que tamién en bi-ha.
Se puen quedar con a mierda de perro- que tamién cagan y dan ferrete- y bien que les fan ( puesto preferén) en os suyos arnals de muitos euros. Ande  no solo se siente cuan o perro escazila, tamién cuan o bezino ye en o escusaú u cuan fa barafundios con a parentela.
Pero m´en boi de os nierbos, prou de fatezas, deziba...  que puen quedase con a mierda de perro, o tarquil de azeite y gasoil, con as polidas chamineras que no echan solo fumo, con a  fulera " asepsia" de o que paez escoscau y ye puerco.
Que nos deixen, a nusatros con os ríos con peñóns, as casas biellas de piedra, l´aire limpio, os grillos, o monte y...as moscas; que no son abellas, ni paixarelas, pero han de bebir con nusatros, os eslanguíus  aldeanos no hemos atro puesto t´ande ir...



miércoles, 11 de julio de 2012

TODO DE CULAS, TAMIÉN O TIEMPO.



Punto de rezos de os debanpasaús. 
¿nos baldrá ta algo agora?



A yo a calor me mata, y Sobrarbe no me paez o mismo, ni o mío país. Ixo de salir ta a calle y que no pase un pelo d´aire, no me paez normal.¿en o Pirineo no fa frio siempre?

Pero no ye por ixo que fa diyas que no escribo. As faziendas muitas bezes nos empuchan hasta cuasi fenos retecular. Diz un amigo mio que ande bi-ha bancos no bi-ha tranquilidá, anque lo paezca. Y prou que ye berdá. Siempre eba pensaú que ni o capitalismo, ni os mandamases ni as trazas de embolicalo todo, que an os poderosos; iban a poder con yo. Pero tiengo que reconocer que comenzipio a ser mas que farta, de os chupasangres y de os figurantes de ista farsa .Perque, isto ye una farsa, en a que unos imos a deixar a piel, mientras atros se fartan bien fartos. Puedo dezir: que en os tiempos de as abundanzias y de os dineros; o mío lugar s´ha quedaú sin chen, por no fer una maldita pista. Custión de prioridaz...

En o tiempo que yeranos ricos, yo no teneba augua en casa. En a era de a comunicazión cuasi emos abiu de matar ta aber internet en o nuestro lugar.

No me espanta que me saquen de casa, ya me sacón de casa a os 9 años. No me espanta a soledá, ni o silenzio, no me espanta o frío, ni a calor... o que de berdá me espanta ye que os sentirs se faigan dineros, que tot amanezca unas zifras en o trachín de as tripas de l´ordenador. Que ixo siga o que bales: o que tiens ye o que bales. A incomprensión atra bez... Ixo si que m´ espanta...